Annie van Loo, tekssjrijfster!

Die in oonvervals Mestreechs bij alles wat zich veurdeit häör meining op pepier zèt in de vörrem vaan gediechte of teks veur leedsjes. En euver dat onvervals Mestreechs heet zie zoe häör eige meining, en die is neet altied 't zelfde es de Veldeke spelling! Dat höb geer misjiens ouch geleze in de gezèt. Wèl weurt eederein dee mannelijk en vrouwelik doorein goejt (die sjink en neet dee sjink) ernstig door häör oonderhawwe. Um mer neet te spreke van diegenige die 't euver loodgieters op woensdag en gein aander däög höbbe (moot netuurlek zien poompemekers op goonsdag en gein aander daog)!

Veur 't duo d'n Awwe en de Aw, dat destieds veural furore maakde op de Tempeleerszittinge (en dao te book stoond es lerekolderduo), maakde zie de leedsjes en conferences en dat deech zie in 't begin veur 'n deil veur die vaan Berrep en Gradus! Bij Petit Paris trooj zie same op met d'n Awwe, de Piele (häöre groete vrund), Johnnie vaan Deurse, Johan PLetzers en aandere. En d'n "titelsong" Petit Paris met meziek van Jean van Libergen is door häör gemaak. 

En daan de vastelaovend netuurlik!
Neet minder es drie kier maakde zie d'n teks veur 't officieel carnevalsleedsje te wete:
- Dat is de sajs (meziek Jean Feij) in 1958;
- Sjannèt (meziek Math Everaarts) in 1959
- 't Nissjeke (meziek Math Everaarts) in 1963
Meh daoneve netuurlik ouch de ëvergreens"die eederein kint, zoe es:
- Nao Väöre (meziek Pie Bex): vaan 't pleetsje gezooinge door Theo Menten heet zie indertied e z 138llever exemplaar gekrege;
- Menier d'n deender (meziek Jean Feij)

Tot zie veur vastelaovend alles liet stoon wete de echte gekke in Mestreech! Neet veur niks woort ze in 1962 same met d'n Awwe tot vastelaovensvierders vaan 't jaor oetgerope. Ouch e sjoen verhaol is tot zie door de zaate hermenie Wie Wie Zoe, Zoe Wie Zoe tot Vastelaovensleedsjessjrijfster ierste klas en iere lid woord beneump! Dat kaom umtot zie 'ns e vastelaovensleedsje heet gemaak boe Zoe Wie Zoe in veurkaom. En ze zag tege häör mam : es geer 't dörref met vastelaovend doed te goon sjuif iech uuch drei daog laank oonder de taofel!
In dee vastelaovestied is zie hielemaol met allerlei carnevalsactiviteite, zoe es 't oetkeze vaan 't vastelaovesleedsje, vergadering vaan de Zaate Hermenikes, oetreike vaan de vastelaovesgezèt, jaorvergadering vaan de Tempeleers, activiteite vaan Abrahamsbroelof en de Vastelaovesgekke. Wee häör daan wèlt spreke moot drei maond vaan te veure 'n aofspraok make! Mèt de carneval zellef ging zie verkleid is vrouw Verzjevee mèt 't Nejkiske in d'n optoch op Zoondag en Maondag, miestal met häör vriendin Netteke en e stel aander vruikes! 't IS mesjiens wel leuk um te vertèlle tot häör versjijning es vrouw Verzjevee te daanke is aon Jan Hoen. Dee waor destieds chef bij Vroom en Dreesman en vroog häör um bij d'n herdrök vaan de proza-werke vaan Olterdisse, oet dat book veur te leze. En zoe is dat gekoume! Meh noe is zie (nao ongeveer 50 kier wèl te zien mèt gewees) 't veurig jaor neet mie in d'n optoch kinne goon umtot zie, wie zie zellef zeet, 'ne Belsje knee heet gekrege in 't hospitaol in Genk. Euverigens wete neet väöl lui tot vrouw Verzjevee volges Olterdissen altied 'n loterij heel veur es get te doen waors in 't Laank Gergsje met es hoofpries 't Nejkiske. Allein woort dee pries noets oetgereik!

Aon 't Zaate Hermeniekes Konkoer mos zie netuurlik ouch vaanaof 't ierste oor met doen. Verkleid es akela sjouwde ze met häöre veendel, dee wie langer wie mier begos te waoge vaan alle medaaljes en aander kiksjozerije die traon honge! De muzikaal bezetting vaan de hermenie waors noets vaan groete allure en is door de jaore heen hiel versjellend gewees, meh ziezellef waor altied vaan de partei! De leste jaore woort zie trouw begeleid door häör dochter Tity met de monika. Met de drei zjenderme kos Annie good opsjete, die koch ze altied um met e stök weurs of get stumpkes of e fles Eels, zoe tot ze op 't kongkoer op 't Vriethof kos veurkroepe!

Minder bekind is tot zie ouch prachtige leedsjes heet gemaak euver häör leefde veur Mestreech en 't Mestreechs. Zoe is dat manjefieke "Sjoen stad Mestreech" (meziek Jean Feij), dat pas gelije nog door Truus Willems erreg sjoen op de CD "Mestreech Merci" weurd gezoonge. Meh zeker deit dao neet veur oonder "Mie Mestreech" (meziek Jean van Libergen). Weier neum iech heij "'t Doug noets bij de lui" (op de wijs vaan Lili Marleen) boe in zie op 'n fien meneer aon zellefspot deit en tegeliekertied "de lui" 'nnen hak zèt!
In 't leedsje " 't Waor magnefiek" (op 'n bekinde Franse wijs) liet ze zien wie 't aajd Mestreech häör aon häör prei ging! Vaan väöl humor getuig 't leedsje "Eus Peerd" (meziek Jean Comes). Dat deit ouch 't leedsje "Es veer straks ins allemaol nao d'n hiemel goon" (meziek Jean Feij). En tot zie häör taole wel kint bewijs ze in 't dreitaolige " 't Land zoonder grens" (meziek Jean Comes). Zoe heet ze ouch 'n Franse vertaoling gemaak vaan "Mestreech is neet breid mh laank" (originele Meestreechsen teks Johan Pletzers, meziek Preudhomme?) wat zie, begeleid door Zate Hermenie Zoe Wie Zoe in Peries op Place Centre Pompidou heet gezoonge. Vaan d'n opbrings heijvaan zien ze 'nnen daag langer in Peries kinne blieve!
Erreg leuk is tot zie pas geleije 'nne "come back" heet gemaak door same met Jean van Libergen 'n optrije te verzörge in de Koepelhof met get leedsjes en versjes. Dao höbbe ze die twie mer metein gevraog veur optrijes veur de carneval en ouch veur keersmes. Want Annie zou neet Annie zien en zie gein Keersverhaolselkes zou höbbe gemaak en veurgedrage! Heh in 't kader vaan dees hommage zou 't wel te wied goon um ouch heij op trök te koume!
Dat is mesjiens get veur 'nne volgende kier!

Mestreech, november 2004 
Jo Rikers (†)