Iech zeuk 'ne miljonair
Mestreech, jannewari 1956
Wie iech nog joonk waor höb iech dèks gedach
iech sleip miech 'ne maan met duite in de wach
want alleweil deit me niks mie met e luunsje
me kin ziech koelik hellepe met 'n haaf miljuunsje
iech dach wat moot iech zoonder sent goon daoen
es iech gaon trowwe in ier en in fetsoen
'n howwelek oet leefde löp dèks mis
umtot zoonder sent de leefde gaw de deur oet is
Refrein :
iech zeuk 'nne miljonair, iech zeuk 'nne miljonair
want iech veul niks veur toes te zitte beij de kwisinière
heer hoof neet groet te zien en ouch neet sjoen
't einigste wat tèlt is 'n miljoen
heer maag get sjeel zien met 'nne kaale kop
wat heet me aon e sjieke sjotel met niks trop
in plaots vaan keemerkes woen iech in e groet hoes
en iech drink sjempie en geef dineekes toes
'n maog of drei die miech 't werrek deit
en iech loup smörregens al in e vloere kleid
In 'nne boontjas werrem ingepak
gaon iech oet reijje in miene cadillac
vaan weurs met krèbkes wel iech niks mie weete
en zal allein nog kaviaar goon eete
me ach wie aanders is alles oetgekoume
iech höb miech 'nne gewoene maan genoome
umtot mien hertsje dat väöl beter voond
en es veer welle koume veer wel roond
Veer vreigele deks wel ins euver de sent
me 't innigste wat telt veer zien kontent
heer is sjus wie iech 'nne Mestreechteneer
helt vaan gezelligheid en vaan plezeer
huure veer de Fanfaar met 't meziek
zien veer d'n hiemel deks nog wel te riek
Want waore veer kraank of koste neet nao achtere goon
waor 't met us en met de sentjes gaw gedoon
de Aw en d'n Awwe