Immigreere
Mestreech, december 1955
Melodie : John, Jimmy en Jonas
me vraog wee geit immigreere
me vraog dat noe neet aon us
Want veer zien Mestreechteneere
veer vinde op 'n aander gein rös
In e vreemd land zien sent te verdeene
me kraog 't daor beter misjien
me veer zowwe us neet geweene
al ete veer in 't land vaan boter, megrien
Refrein :
Sjeng, Sjoke en Sjerra
in de stad aon de Maas stòng hun weeg
Sjeng, Sjoke en Sjerra
dien goon neet eweg oet Mestreech
Sjeng, Sjoke en Sjerra
die ete neet alledaog sjink
me veurgood hun sjoen stad te verlaote
gein haor op hunne kop die draon dink
En zow 't dèks eine riskeere
um te goon nao e land euver zie
heer zow ziech haaf doed sjaggerneere
want 'n twiede Mestreech is neet mie
Wat zow heer daan moote beginne
al had heer de sent met den houp
dat geveul wat veer höbbe vaan binne
jao dat is toch met geld neet te koup
Sjeng, Sjoke en Sjerra
heimwee dat knaog aon hun prei
Sjeng, Sjoke en Sjerra
hun hertsje dat bleif altied heij
Sjeng, Sjoke en Sjerra
die veule ziech nörreges toes
en zalle Mestreech neet verlaote
al zien ze zoe errem wie 'n loes
de Aw en d'n Awwe