Refrein :

E peerd vaan marsepein
’n oranje manderijn
Sjókkelate lètter ouch debij
en lekker muiskes twie of drei
get spikkelatie drop
en nog ’n taai taai póp
jao dat laog vreuger op d’n teleur vaan Sinterklaos

Couplèt 1:

Vreuger doge kinder neet väöl vraoge
Sinterklaos dee brach ‘n kleinegheid
meh wat veer ’t allerleefste kraoge
waor deen teleur mèt snóp dat is e feit
Jao veer kraoge ouch wel get te speule
neet zoeväöl mer erg waor dat neet
get kleins dao leet heer us daan blij mèt veule
de waors content dat is nog wat iech weet

Couplèt 2 :

Noe d’n daag make de kinder lieskes
’t kin neet op met hunne fantasie
zie kriege vaan Sinterklaos surprieskes
neet ein of twie, meh altied wel get mie
Toch is pekskesaovend nog e fieske
want de kindersnuutskes straole blij
En kriege ze neet alles vaan hun lieske
daan bringk de keersman dat nog wel debij

Couplèt 3

Wie is ‘t Sinterklaosfies euver jaore
kinste dao es keend daan nog nao touw
zalle veer dat kinderfies bewaore
of geit dat stèlaon eweg zoonder berouw
Heet de keersmaan Sinterklaos verdreve
en steit de kinderwereld op de kop
Daan dink iech toch mèt weemood nog ins eve
aon deen teleur met al dat lekkers drop